HUJAN tengah malam su kas tenggal banjir di depan rumah. Itu got semen yang bekin dari doi paroyek pamarenta su habis satenga. Itu banjir pung jahat mati pung, bukan hanya bawa diri sa. Sama ke ada tangan saribu, berebut deng akar pohon kiri kanan. Masok pi got kas tapukul tembok kas tapoa tengah jalan. Pagi buta orang dong mo pi balanja di pasar, mesti pakai celana jengki. Kalo sonde, kas tenggal itu ujung calana besapu deng banjir. Jalan dong su baponu deng sampah, dar daun pisang sampe bungkus sabun. Son tau dar mana datang itu banjir, pagi buta barang busuk dong su tasiram di jalan depan rumah.