AMA Tobo pusing barat. Dia pung ana parampuan su badoncis, tar mau pi sakola. Dia pung su manangis makrareuk, tar mo pinda pi skola yang baru, andia ko dia tar mau pi sakola lai. Ko salama ini, it ana skola di skola yang ada nama na, tiba-tiba dong ju sama ke PeEnEs ko so kana mutasi pi skola yang baru.

"Lu pi skola su. Jang ane-ane do. Sapa yang mo kas pinda deng lu. Lu kira kira, kalo pinda sakola tu gampang. Jang bekin isu yang ane-ane dolo. Lai sadiki, beta iskarobi deng lu baru tau," Ama Tobo masparak deng dia pung ana parampuan.

Ina Feok blom kas tau dia pung laki tentang dia pung ana parampuan yang mau kana pinda sakola. Ini pagi, Ina Feok su barias pung rapi lai. Ama Tobo tahedek ju lia dia pung bini su bagaya mati pung.

"We, lu mo pi tapaleuk di mana lobang lai? Mas papagi, bukan urus bamasak, ma su pake baju bagus-bagus ko mo kaluar. Kalo mo jalan tu, abis karja dolo, baru jalan," Ama Tobo togor dia pung bini.

Ina Feok pung dara langsung nae. Mamtua ju masparak bale dia pung laki. "Lu bilang apa? Beta ada mo pi skola deng kotong pung ana. Lu tau ko sonde, beta mo pi parotes itu guru dong, ko su barapa hari ini, ana dong tar ada pelajaran. Dong pi skola hanya dudu-dudu abis pulang. Ko guru dong taku masu mangajar deng dong."

Ina Feok baomong tarus, karna rasa di atas angin na. Dia pikir skali-skali dia masparak Ama Tobo ju. "Kotong pung ana mo kana iskarobi dari skola yang skarang pi skola yang baru. Andia ko orang tua dong su pi demo di dewan. Na ko dewan su kas kaluar surat rekomendasi bilang ini ana dong tatap skola di tampa yang skarang. Ma lu tau ko sonde, biar dong pi skola ju, dong sonde dapa pelajaran. Itu guru dong ju tar ada pung hati. Ko dong taku deng kapala sakola na. Jang sampe ko kapala skola su kana tekan dari atas tu. Na dia tekan guru dong. Ini su dia pung akibat," Ina Feok kasi jalas deng dia pung laki.

Ama Tobo langsung manyao. "Na kalo bagitu na, kastau babae. Ko beta heran deng ini pamarenta ni. Dong pikir ini ana dong ke bola pingpong sa. Dong pikir ini ada dong PeeNeS sa. Kasi pinda pi sana, kasi pinda pi sini. Guru kana mutasi, PeEnEs kana mutasi, skarang lai, siswa dong kana mutasi. Yang be sa. Mana ko bekin ana-ana dong model bagini." Ama Tobo ju langsung mara karna dengar dia pung ana mo kas pinda.

Ama Tobo langsung kas inga dia pung bini. "Kalo bagitu na, beta ju iko deng lu. Kotong pi parotes sama-sama di sana. Kotong musti bawa itu dewan dong pung surat, biar ko kapala sakola dong sonde bisa malawan lai."

Ama Tobo deng Ina Feok tar tau kalo dia pung ana ada iko dengar. Itu ana ju tamba dia pung pandapat. "Dewan dong ju musti capat bekin rapat deng pamarenta. Biar ko ada keputusan yang capat, jadi ana-ana dong sonde bingung ke skarang. Dong jang hanya dudu di dong pung kantor sa, turun ko pi lia ana-ana dong. Batul ko sonde, yang pamarenta kasi keterangan. Kalo hanya dengar di tampa na susa. Kotong tunggu dewan dong, karna kotong musti pi mana lai."

Sambil baomong, itu ana angka tas ko pi skalo deng batarea kas tau dia pung mama deng bapa kalo dong mo pi demo rame rame di dewan lai. (hermina pello)