"MANUSIA tidak tau diri. Jadi orang besar deng pangkat tinggi tarus dapa jabatan hanya mau pancuri doi rakyat. Dasar tidak tau malu. Lebe bae dong mati badiri sa. Bet sumpa sang dong. Katong masyarakat kici dong paksa bayar pajak. Katong sond bayar dong kas denda. Katong su bayar abis dong ceke munta darah itu doi," Ama Tobo baomong sandiri.

"Papa ee.. su kanapa lai," Ina Feok togor dia pung laki.
"Ais mo karmana lai. Katong orang kici ni talalu saki hati. Su cari doi satenga mati. Ais bayar pajak lai. Katong balom bayar patugas pajak datang tagi doi. Padhal katong mo beli makan sa sond bisa. Ma itu pajabat basar dong ceke ame itu doi sond pikir deng katong orang kici," Ama Tobo tamba foe.

"Bagini papa ee.... Papa jang talalu tagang. Itu manusia dong bukan hanya ceke katong pung doi sa. Samua orang kici pung doi dong ceke. Dong memang manusia rakus, egois. Itu manusia, di dong pung otak tu ponu kuasa galap. Dong hanya bapikir mo kas susa banya orang sa. Kalo dapa lia orang susa dong sanang mo mati. Su bagitu, dong paling munafik mo mati. Liat orang susa sangaja kasihan deng itu orang. Ju kalo di orang banya dong sangaja kas doi. Padhal itu doi pancuri, doi karopsi," Ina Feok menyao.  

"Awii, mama ju emos ooo... Mama kalo baomong sat kali lumayan ju. Ma pung kata-kata ju talalu baisi mo mati. Bet sond sangka bet pung maitua bisa omong pintar mo mati," Ama Tobo ganggu Ina Feok.

"Wooee tua, lu jang kira katong hanya di dapur sa sond tau perkembangan. Kamaren be pi pasar dapa lia ana mahasiswa dong bajalan di tenga jalan. Dong bilang, gantong koruptor, tangkap sang dong kas maso panjara," Ina Feok deng emosi carita dia pung laki.

Belum puas bacarita, Ina Feok tanya ame Ama Tobo. "Tadi Lu omong beta, bilang beta pung kata-kata baisi. Tolong lu kas jalas itu kata do?"

Ama Tobo dangar dia pung maitua batanya, muka sanyum kol bungkus. "Bagini, mama jang kas kaluar itu kata-kata sarempet-sarempet bahaya. Beta sond punya maksod deng itu kata. Tapi kalo ma pung maksod laen, tarsera mama sa. Ko dosa mama yang tanggong sandiri to," Ama Tobo kas jalas dia pung maitua.  

"Adu papa eee jang mara eee. Beta talalu emosi na. Tapi kalo papa pung maksud sarempet bahaya, sond apa ju. Bet ju mangarti na. Katong dua khan su lama jadi laki bini to? Mama su tau papa pung mau. Papa ju tau mama pung mau," Ina Feok sangaja manja di dia pung laki.  

"Mamaee, tadi khan katong dua baomong orang karopsi. Beta mo tamba lai. Ini negara bisa ancor karena orang pintar dong. Hanya dong sa yang bisa kas bae deng kas rusak ini negara. Katong orang kici salalu tarima resiko. Itu manusia dong biar su jalas ceke doi rakyat tapi mas bela diri lai. Dong orang pintar doi banya lai dong sond kana hukum. Coba kalo katong orang kici. Pancuri ayam sa maso panjara. Beta sond mangarti lai katong pung aturan. Dong bilang, tidak ada manusia yang kabal hukum. Samua orang di dapan hukum sama," Ama Tobo baomong panjang lebar.

"Papaeee, darpada katong dua baomong kapala pusing. Lebe bae katong pi kas barisi kabun. Parsetan deng manusia korupsi dong. Lebe bae katong urus kabun darpada baomong itu manusia karopsi sonde tau diri." (reddy ngera)